நீங்கள் தேடியது "கர்ப்பிணி பலி"

பல்லடம்:

திருப்பூர் அனுப்பர்பாளையத்தை சேர்ந்தவர் லோகேஸ்வரன் (30). கோவை பீளமேட்டில் உள்ள கம்ப்யூட்டர் நிறுவனத்தில் சாப்ட்வேர் என்ஜினீயராக வேலை பார்த்து வருகிறார்.

இவருக்கும் உடுமலை பூலாங்கிணறை சேர்ந்த பி.காம். பட்டதாரியான தமிழ்செல்விக்கும் (22) கடந்த ஒரு வருடத்திற்கு முன் திருமணம் நடைபெற்றது.

தமிழ்செல்வி தற்போது 9 மாத கர்ப்பிணியாக இருந்தார். இதையொட்டி அவருக்கு நேற்று திருப்பூர் அனுப்பர்பாளையத்தில் உள்ள கணவர் வீட்டில் வளைகாப்பு நிகழ்ச்சி நடைபெற்றது.

வளைகாப்பு முடிந்ததும் லோகேஸ்வரன், அவரது மனைவி தமிழ்செல்வி, அவரது பெற்றோர் சேகர், ஜோதிமணி ஆகியோர் காரில் பூலாங்கிணறுக்கு புறப்பட்டனர்.

காரை லோகேஸ்வரன் ஓட்டி சென்றார். பல்லடம் அருகே உள்ள அரசங்காடு என்ற பகுதியில் சென்ற போது எதிரே ஒரு கார் வந்தது. திடீரென இரு கார்களும் நேருக்கு நேர் மோதிக்கொண்டது.

இதில் காரை ஓட்டி சென்ற லோகேஸ்வரன் அவரது மனைவி தமிழ் செல்வி, காரில் இருந்த சேகர், ஜோதிமணி ஆகியோரும் மற்றொரு காரில் வந்த மணிகண்டன், தண்டபாணி, சாந்தாமணி, மனோன்மணி ஆகியோரும் காயம் அடைந்தனர்.

அவர்கள் 8 பேரையும் பல்லடம் அரசு ஆஸ்பத் திரிக்கு கொண்டு சென்றனர். ஆனால் வழியிலே நிறைமாத கர்ப்பிணி தமிழ்செல்வி பரிதாபமாக இறந்தார். அவரது வயிற்றில் இருந்த குழந்தையும் இறந்தது.

படுகாயம் அடைந்த மற்ற 7 பேரும் பல்லடம் அரசு ஆஸ்பத்திரியில் முதலுதவி சிகிச்சைக்கு பின் கோவை அரசு ஆஸ்பத்திரியில் அனுமதிக்கப்பட்டு உள்ளனர்.

விபத்து குறித்து பல்லடம் போலீசார் விசாரணை நடத்தி வருகிறார்கள்.

விபத்தில் தனது மனைவி மற்றும் அவரது வயிற்றில் இருந்த குழந்தை பலியான தகவல் கிடைத்து லோகேஸ்வரன் கதறி துடித்தார். அவரது உறவினர்களும், தமிழ்செல்வி உறவினர்களும் பல்லடம் அரசு ஆஸ்பத்திரிக்கு வந்து கதறி அழுத வண்ணம் இருந்தனர். இதனால் அப்பகுதியே சோகத்துடன் காணப்பட்டது.

மேலூர்:

மதுரை மாவட்டத்தில் பலர் டெங்கு மற்றும் மர்ம காய்ச்சலால் பாதிக்கப்பட்டு இறந்து வருகின்றனர். மதுரை அரசு ஆஸ்பத்திரியில் நாள் தோறும் காய்ச்சலுக்காக சிகிச்சை பெறுபவர்களின் எண்ணிக்கை அதிகரித்து வருகிறது.

மதுரை மாவட்டம், மேலூர் அருகே உள்ள தும்பைப்பட்டி ஊராட்சிக்கு உட்பட்டது சாலக்கிபட்டி. இந்த ஊரைச் சேர்ந்தவர் ராஜபாண்டி. எலக்ட்ரீசியனான இவருக்கு வீரசிகாமணி (வயது 28) என்ற மனைவியும், 2 பெண் குழந்தைகளும் உள்ளனர்.

இந்த நிலையில் வீரசிகாமணி மீண்டும் கர்ப்பமானார். கடந்த சில நாட்களாக அவருக்கு தொடர் காய்ச்சல் இருந்து வந்தது. மேலூர் தனியார் ஆஸ்பத்திரியில் சிகிச்சை பெற்றும் காய்ச்சல் குணமாகவில்லை.

இதையடுத்து வீரசிகாமணி மதுரை அரசு ஆஸ்பத்திரியில் அனுமதிக்கப்பட்டார். அங்கு தனி வார்டில் அவருக்கு தீவிர சிகிச்சை அளிக்கப்பட்டது. இருப்பினும் சிகிச்சை பலனின்றி வீரசிகாமணி பரிதாபமாக இறந்தார்.

சாலக்கிபட்டியில் சுகாதார சீர்கேடு நிலவி வருவதால் பலர் மர்ம காய்ச்சலால் பாதிக்கப்பட்டு சிகிச்சை பெற்று வருகின்றனர்.

தற்போது காய்ச்சலால் கர்ப்பிணி பெண் இறந்திருப்பது அந்தப்பகுதி மக்களிடையே அதிர்ச்சியை ஏற்படுத்தியுள்ளது.

எனவே சுகாதாரத்துறையினர் இனியும் காலதாமதம் செய்யாமல் சாலக்கிபட்டியில் மருத்துவ முகாம் நடத்தி காய்ச்சல் பரவுவதை தடுக்க வேண்டுமென பொதுமக்கள் கோரிக்கை விடுத்துள்ளனர்.

மகுடஞ்சாவடி:

சேலம் மாவட்டம் மகுடஞ்சாவடி அருகே உள்ள தடிக்காரனூர் பகுதியைச் சேர்ந்தவர் சுரேஷ், தனியார் நிறுவன ஊழியர்.

இவரது மனைவி சுகன்யா (வயது 20). கடந்த 11 மாதங்களுக்கு முன்பு தான் இவர்களுக்கு திருமணம் நடந்தது. தற்போது சுகன்யா 8 மாத கர்ப்பிணியாக இருந்தார்.

இந்த நிலையில் சுகன்யாவுக்கு கடந்த 5 நாட்களுக்கு முன்பு திடீரென காய்ச்சல் ஏற்பட்டது. இதனால் அந்த பகுதியில் உள்ள ஒரு தனியார் ஆஸ்பத்திரியில் அனுமதிக்கப்பட்டு சுகன்யா சிகிச்சை பெற்று வந்தார்.

தொடர்ந்து காய்ச்சலின் தாக்கம் அதிகமாக இருந்ததால் மகுடஞ்சாவடியில் உள்ள மற்றொரு தனியார் ஆஸ்பத்திரியில் அனுமதிக்கப்பட்டு சிகிச்சை பெற்றார்.

அங்கு தீவிர சிகிச்சை அளித்தும் உடல்நிலை மோசம் அடைந்ததால் நேற்று இரவு சேலம் அரசு ஆஸ்பத்திரிக்கு கொண்டு செல்லுமாறு டாக்டர்கள் கூறினர்.

உடனே சுகன்யாவை அவரது உறவினர்கள் சேலம் அரசு ஆஸ்பத்திரிக்கு கொண்டு வந்தனர். ஆனால் வரும் வழியிலேயே சுகன்யா பரிதாபமாக இறந்துவிட்டார்.

இதைப்பார்த்த உறவினர்கள் கதறி அழுதனர். அவரது உடல் சேலம் அரசு ஆஸ்பத்திரியில் பிரேத பரிசோதனைக்காக வைக்கப்பட்டுள்ளது.

இந்த சம்பவம் குறித்து தகவல் அறிந்த சுகாதாரத் துறை ஊழியர்கள் மற்றும் போலீசார் அந்த பகுதியில் முகாமிட்டு ஆய்வு செய்வதுடன் விசாரணையும் நடத்தி வருகிறார்கள்.

பலியான சுகன்யாவுக்கு டெங்கு காய்ச்சலா? அல்லது பன்றிக்காய்ச்சலா? என்பதை உறுதி செய்ய டாக்டர்கள் மறுத்துவிட்டனர்.

ஏற்கனவே கடந்த 5 நாட்களுக்கு முன்பு சேலம் மாவட்டம் இளம்பிள்ளை பகுதியைச் சேர்ந்த நெசவுத் தொழிலாளி ஒருவர் மர்ம காய்ச்சல் பாதிப்பால் உயிர் இழந்தார். இதனால் காய்ச்சல் சாவு எண்ணிக்கை 2 ஆக உயர்ந்துள்ளது.

சேலம் மாவட்டத்தில் சேலம் மாநகர், ஓமலூர், மேட்டூர், சங்ககிரி, வாழப்பாடி, ஆத்தூர் உள்பட பல்வேறு பகுதிகளில் காய்ச்சல் பாதிப்பு அதிகமாக உள்ளது.

இதனால் அரசு மற்றும் தனியார் ஆஸ்பத்திரிகளில் தினமும் ஆயிரக்கணக்கானோர் வந்து சிகிச்சை பெற்று செல்கிறார்கள்.

இதில் பன்றிக்காய்ச்சல், டெங்கு காய்ச்சல் அறிகுறி உள்ள 100-க்கும் மேற்பட்டோர் ஆஸ்பத்திரியில் தங்கி சிகிச்சை பெற்று வருகிறார்கள்.

காய்ச்சலை தடுக்க சுகாதாரத்துறை அதிகாரிகள் தீவிர நடவடிக்கை மேற்கொள்ள வேண்டும் என்றும் காய்ச்சல் பாதித்தவர்கள் மற்றும் அவரது உறவினர்கள் கோரிக்கை விடுத்துள்ளனர்.

முள்ளக்காடு:

தூத்துக்குடி அருகே உள்ள முள்ளக்காடு வடக்கு தெருவை சேர்ந்தவர் முருகன். இவரது மனைவி சாந்தினி (வயது 26). இவர்களுக்கு 2 வயதில் ஒரு ஆண் குழந்தை உள்ளது. தற்போது சாந்தினி 8 மாத கர்ப்பிணியாக இருந்தார். இந்நிலையில் சாந்தினிக்கு திடீர் காய்ச்சல் ஏற்பட்டது.

கடந்த ஒரு வாரமாக முத்தையாபுரம் மற்றும் தூத்துக்குடியில் உள்ள தனியார் மருத்துவமனைகளில் சிகிச்சை பெற்றார். ஆனால் அவருக்கு காய்ச்சல் குணமாகவில்லை. இதனால் மேல் சிகிச்சைக்காக மதுரையில் உள்ள தனியார் மருத்துவமனையில் சாந்தினி சேர்க்கப்பட்டார்.

ஆனால் அங்கு சிகிச்சை பலன் அளிக்காமல் சாந்தினி பரிதாபமாக இறந்தார். இந்த சம்பவத்தை தொடர்ந்து தூத்துக்குடி மாவட்டம் முழுவதும் சுகாதார துறையினர் உஷார்படுத்தப்பட்டனர். ஏற்கனவே முள்ளக்காடு பகுதியில் பலருக்கு காய்ச்சல் பாதிப்பு உள்ளது.

சுகாதார துறையினர் போதிய மருத்துவ வசதிகள் செய்யவில்லை என்றும் தடுப்பு நடவடிக்கை மேற்கொள்ளவில்லை எனவும் பொதுமக்கள் குற்றம் சாட்டியுள்ளனர்.

இது தொடர்பாக சாந்தினியின் கணவர் முருகன் கூறுகையில், ‘‘எங்கள் பகுதியில் குடிநீர் உடைந்து சாலையில் தேங்கி கிடக்கிறது. ஆங்காங்கே கழிவுநீரும் தேங்கியுள்ளன. சுகாதார நடவடிக்கைகள் சரியில்லை. எனது மனைவிக்கு காய்ச்சல் வந்தபோதே மருத்துவமனைகளில் சேர்த்து சிகிச்சை அளித்தேன். ஆனால் முறையான தடுப்பு நடவடிக்கைகள் மேற்கொள்ளப்படவில்லை. இதனால் எனது மனைவியை இழந்துவிட்டேன்’’ என கண்ணீருடன் கூறினார்.

மேலும் இதுபற்றி அந்த பகுதி பொதுமக்கள் கூறும்போது, இப்பகுதியில் ஒரு லட்சத்துக்கும் அதிகமான மக்கள் வசிக்கிறார்கள். அவர்களுக்கு போதிய மருத்துவ வசதிகள் இல்லை. இங்குள்ள சுகாதார நிலையத்தில் ஒருவர் மட்டுமே டாக்டர். மற்ற 3 பேர் பயிற்சி டாக்டர்கள். இங்கு காலையில் பரிசோதனைக்கு சென்றால் வெளியில் வர மதியம் ஆகிவிடுகிறது. எனவே கூடுதல் டாக்டர்கள் நியமிக்கவேண்டும் என்றனர்.

இந்த நிலையில் மர்ம காய்ச்சலுக்கு கர்ப்பிணி பலியானதால் முள்ளக்காடு பகுதியில் பொதுமக்கள் மத்தியில் பீதி ஏற்பட்டுள்ளது. உடனடியாக சுகாதாரதுறையினர் தூத்துக்குடி பகுதி முழுவதும் காய்ச்சல் தடுப்பு நடவடிக்கைகளை தீவிரப்படுத்தவேண்டும் என்கின்றனர் பொதுமக்கள்.

இதுகுறித்து சுகாதாரத்துறை அதிகாரியிடம் கேட்ட போது, முள்ளக்காட்டில் கர்ப்பிணி சாந்தினி காய்ச்சலால் பாதிக்கப்பட்டு இறந்து உள்ளார். அவர் தனியார் மருத்துவமனைகளில் சிகிச்சை பெற்று உள்ளார். அவருக்கு என்ன விதமான பாதிப்பு ஏற்பட்டு இருந்தது? என்பது குறித்து விரிவாக விசாரித்து அடுத்தக்கட்ட நடவடிக்கை எடுக்கப்படும் என்று தெரிவித்தார்.

இதனிடையே டெங்கு காய்ச்சலை தடுக்க தூத்துக்குடி மாநகர பகுதி முழுவதும் இன்று நிலவேம்பு குடிநீர் வழங்கப்பட்டது. அரசு துறையினரும், தனியார் அமைப்புகளும் இந்த பணியில் ஈடுபட்டுள்ளார்கள்.

போபால்:

மத்தியப்பிரதேசம் மாநிலம் முரைனா மாவட்டத்தைச் சேர்ந்தவர் சுரக்‌ஷா தகாட். நிறைமாத கர்ப்பிணியான இவருக்கு இன்று அதிகாலை திடீரென பிரசவ வலி ஏற்பட்டது. இதையடுத்து, ஆம்புலன்சிற்கு தகவல் அளிக்கப்பட்டது. ஜனனி  எக்ஸ்பிரஸ் என்ற பெயரில் இயங்கி வரும் அரசு ஆம்புலன்சில் சுரக்‌ஷா அரசு மருத்துவமனைக்கு அழைத்துச் செல்லப்பட்டார்.

ஆம்புலன்ஸ் கைலாராஸ் நகருக்கு அருகில் செல்லும் போது பஸ் மோதி விபத்துக்குள்ளானது. அந்த விபத்தில் ஆம்புலன்சில் பயணம் செய்த கர்ப்பிணி பெண் சுரக்‌ஷா, அவரது மாமியார் மற்றும் ஆம்புலன்ஸ் டிரைவர் பரிதாபமாக உயிரிழந்தனர். சுரக்‌ஷாவின் கணவர் உட்பட சில படுகாயமடைந்த நிலையில் மருத்துவமனையில் சிகிச்சை பெற்று வருகின்றனர்.

இந்த விபத்து குறித்து போலீசார் விசாரணை நடத்தி வருகின்றனர். மேலும், தலைமறைவாக உள்ள பஸ் டிரைவரை தேடும் பணியில் போலீசார் ஈடுபட்டுள்ளனர்.